Кыыллаах Арыыттан төрүттээх Дойду дьиҥ чахчы патриота, Саха сиригэр эрэ буолбакка бүтүн Россияҕа биллэр политик Зоя Афанасьевна Корнилова кулун тутар 5 күнүгэр сирдээҕи олоҕо быһынна. Бу улахан сүтүк! Бүтүн Россия сүтүгэ!
Зоя Афанасьевна Россия государственнай Думатыгар икки төгүл, Ил Түмэҥҥэ үс төгүл талыллан үлэлээтэ, Россия үтүөлээх экономиһа, Саха Республикатын народнай хаһаайыстыбатын үтүөлээх үлэһитэ, экэнэмическэй наука кандидата, Саха Өрөспүүбүлүкэтин бочуоттаах олохтооҕо.
Государство таһыма масштабтаах толкуйдаах, Сахабыт сирин интириэһин көмүскээччи, туруорсааччы таһымнаах биир дойдулаахпыт төрөөбүт төрүт Кыыллааҕар кэлэ сылдьан биир дойдулаахтарыгар эппит тыллара, муударай сүбэлэрэ өйбүтүгэр — санаабытыгар сүппэттик иҥпиттэрэ:
«Өҥ буордаах Өлүөхүмэ албан аатын төнүннэрэр курдук үлэлээҥ, кураанахсыйбыт буолалары чөлүгэр түһэриҥ, Кыыллаахха тыа хаһаайыстыбатын күүскэ сайыннарыҥ, кластердары тэрийиҥ. Кыыллаах Арыыбыт өҥ буоругар тугу да бырах барыта үүнэр, ону толору туһаныҥ!«, — диэн ийэлии сүбэлээн этэрэ.
2000 сыллардаахха улахан уу кэлиилэригэр саҕаламмыт үрдүк сиргэ көһүүнү Зоя Афанасьевна: «Остров Кыллах и в будущем останется «кормилицей» для кыллахцев, так как на всем протяжении р. Лены в Олекминском улусе не найти земли равной по плодородию земле острова» диэн туруорсубута, ол түмүгэр 2006 сылга саҥа бөһүөлэк тутуута саҕаламмыта.
Кэлин дойдутугар кэлэ сылдьан оҕолору, ыччаты кытта көрсүһүүлэригэр куруук Төрөөбүт сиргэ, Дойдуга таптал, бэриниилээх буолуу туһунан үөрэтэрэ — такайара.
Зоя Афанасьевнабыт тапталлаах кэргэнигэр Дмитрий Дмитриевичка, оҕолоругар, кийиитигэр, сиэннэригэр, сахабыт сирин дьонугар дириҥ кутурҕаммытын тиэрдэбит!
Биир дойдулаахпыт Зоя Афанасьевна Саха сирин сайдыытыгар үлэлэрин, хайа да саҕалааһыҥҥа сүрүн сүбэлэрин, сырдык мөссүөнүн өйбүтүгэр-санаабытынар куруук илдьэ сылдьыахпыт, умнуохпут суоҕа.
Тумус туттар Зоя Афанасьевнабыт — Кыыллаах кыыһа, быдан дьылларга быраһаай!
Кыыллаах дьонун — сэргэтин аатыттан Р.Е. Лавернова.
11.03.2025 с.