Бу сыл Россияҕа дьиэ кэргэн, Саха республикатыгар оҕо саас, Ѳлүѳхүмэ оройуонугар тѳрүт тыл сылыгар аналлаах үгүс тэрээһиннэр буолаллар. Ол курдук Кээччи нэһилиэгин олохтоохторун кѳҕүлээһининэн бэрт сэргэх күрэх буолла. Бу тэрээһин Саха республикатын бочуоттаах бэтэрээнэ Роза Максимовна Брагина 90 сааһын туолар сырдык кэриэһигэр анаммыт. Ааттыын да астык «Ас-тык Шоу» күрэх ирдэбилинэн дьиэ-кэргэнинэн кыттааһын (ийэ,аҕа оҕотунаан ,эбээ эһээ сиэнинээн ) ас астаан кэпсиэхтээхтэр, кѳрдѳрүѳхтээхтэр диэн этэ. Хайдах астыылларын толору видеоҕа устан ыытыахтаахтар уонна кэпсэтии сахалыы барыахтаах диэн. Күрэх кыайыылаахтарыгар олус бэрт бириистэр анаммыттар, ол курдук 1 миэстэ 10000, 2 миэстэ 8000, 3 миэстэ 6000 солкуобай.
Кыыллааахтан Анна Константиновна Корнилова кыыһын Нарыйа Родионовнаны, сиэнин Сайаананы кытары бу күрэх муӊутуур кыайыылааҕа буолан үѳрүү ѳрѳгѳйүн биллилэр.
Үлэ бэтэрээнэ Анна Константиновна 48 сыл Кыыллаах нэһилиэгин уһуйааныгар тахсыылаахтык үлэлээн билигин бочуоттаах сынньалаӊӊа олорор. Үс оҕо иһирэх ийэтэ, сэттэ сиэн амарах эбэтэ. Бу күрэххэ кыыһынаан, сиэнинээн уу сахалыы кыттан кѳбүѳрдээх лэппиэскэ астаан үрдүк сэӊээриини ылан кыайыылаах тахсыбыттарыгар биир дойдулаахтара Кыыллаахтар үѳрүүлэрин бииргэ үллэстэллэр.
Тѳрүт тыл дьиэ кэргэнтэн саҕалаан саргыланнын! Ѳбүгэ үгэһэ, аһа-үѳлэ дьиэ кэргэӊӊэ харыстанар, үѳрэтиллэр, кѳлүѳнэттэн кѳлүѳнэҕэ бэриллэ турдаҕына норуот кэскиллэнэр, туругурар!
Мария Ларионова.